Chilli saus soya saus meri saas by Raeesa Siddique

چلی ساس سویا ساس میری ساس

از قلم: رئیسہ صدیق

 

آج لمبے عرصے کے بعد ہاتھ میں باؤل۔۔۔ جس کے اندر جھانکو تو چٹ پٹے نوڈلز نظر آئیں گے۔۔۔ ٹی وی لاؤنج میں صوفے پر چوکڑی مارے۔۔۔ ایک ہاتھ میں ریموٹ اور دوسرے میں باول۔۔۔ باؤل سے اٹھتا دھواں چہرے کے چار سو پھیلا شناخت کو چھپا رہا تھا۔۔۔ بے صبری کا مظاہرہ کرتے ہوئے سکرین کو زوم کیا ۔۔۔تو آنکھیں حیرت سے پھیل گئیں یہ دیکھ کر کہ ۔۔۔وہ۔۔۔وہ تو "ہم" یعنی "میں" تھی۔۔۔ بات کو سمجھو ناں۔۔۔ سسرال میں "مست ماحول اور میٹھے چول" بیٹھ کر کھانا کوئی آسان کام نہیں ہوتا۔۔۔ خیر مست ماحول تو بنا لیا ہم نے۔۔۔۔ اب باری تھی۔۔۔ میٹھے چول ۔۔۔۔میرا مطلب۔۔۔ نوڈلز کھانے کی۔۔۔ اور یہ کونسا مشکل کام تھا جو دیر کرتے۔۔۔ ایک کے بعد ایک چمچ ۔۔۔آنکھیں بند کیے۔۔۔ اپنے اندر سکون اترتا  محسوس ہوا۔۔۔ اس کے بعد آنکھیں کھولیں۔۔ تو دھیان ٹی۔ وی پر چلتے پروگرام کی طرف گیا ۔۔۔۔جہاں چلی کی ساس اور سویا کی ساس کو بنانے کا طریقہ بتایا جا رہا تھا۔۔۔یہ دیکھنے کے بعد دماغ میں ایک بھنگڑا ڈالتا ہوا آئیڈیا آیا۔۔۔ اس آئیڈیے نے تو اب آرام سے بیٹھنے نہیں دینا تھا سو۔۔۔باؤل پکڑتے کچن کی جانب دوڑ لگا دی۔۔۔فرائی پین چولہے پر چڑھایا۔۔۔ جس میں چار چمچ لہسن پاؤڈر اور دو چمچ گارلک پاؤڈر ڈال کر

اتنا بھونا کہ اس کا رنگ کالا نش اور ذائقہ کوڑا زہر ہو گیا۔۔۔ اب پانچ چمچ ہلدی۔۔۔ دس ڈبے پیسی ہوئی لال مرچ۔۔۔ ایک پیکٹ گرم مصالحہ۔۔۔ آدھی چمچ چینی۔۔۔ او سوری ۔۔۔چینی غلطی سے ڈال دی۔۔۔ خیر پریشانی کی بات نہیں۔۔۔ آدھی چمچ ہی تو ہے۔۔۔۔ اچھا ایک گلاس پانی اور حسب ذائقہ نمک ڈال کر اسے ہلکی آنچ پر رکھ دیا۔۔۔ پانی خشک ہونے تک۔۔۔ جلدی جلدی سے دوسرے اجزا کو تیار کیا۔۔۔۔ او بھئی کدھر جا رہے ہیں۔۔۔ دو منٹ صبر کر کے ادھر دیکھیں۔۔۔۔ اب میں اس میں ڈال رہی ہوں ایک ڈبہ پھپھے کٹنی پاوڈر۔۔۔تین باؤل چلاکیوں کے بھر کر ۔۔۔۔جس میں میسنا پن مصالحہ بھی شامل تھا۔۔آنچ کو دھیما رکھنا ہے تاکہ یہ اندر تک پک جائیں۔۔۔ اب اس میں ڈالیں گے ایک ڈبہ اداکاری مصالحے کا۔۔۔ اور پھر اس میں ڈال دیں گے باریک پیسا ہوا کوتا(لڑاکا) پن پیسٹ ۔۔۔ اور چٹکی بھر پیار ۔۔۔بلکہ اس کو رہنے دیتے ہیں ۔۔۔کیونکہ ضرورت ہی نہیں۔۔۔ اب اس میں شامل کریں گے حسب حالات  معصومیت۔۔۔پھر اس میں اتنا چمچ چلانا ہے کہ یہ یک جان ہو جائے۔۔۔ اب اس کو ڈش آؤٹ کرتے ہیں۔۔۔ لیکن ایک منٹ۔۔  فائر والی آنچ دینا تو میں بھول گئی۔۔۔چلو جی یہ ڈال دیا تھوڑا سا آئل اور لگا دی آگ۔۔۔ آئے ہائے مزے ۔۔۔۔اسے جلتا ہوا دیکھ کر میرے تو کلیجے میں ٹھنڈ پڑ گئی ہے۔۔۔چلو اب تھوڑا سا سٹائل مار کر۔۔۔ اس پین کو ہوا میں اچھالتے ہیں۔۔۔ ایسا کرتے ہوئے بہت مزہ۔۔۔۔ ہائےۓۓۓ ہائےۓۓۓے۔۔۔ اللہ جی میں مر گئی۔۔۔۔ فرائی پین اپنے اجزاء کے ساتھ ہمارے منہ کے اوپر اور ہم نیچے زور و شور سے کراہ رہے تھے۔۔۔ اوے ہوئے یہ کیا کر دیا بہو۔۔۔اٹھو اٹھو جلدی سے منہ دھو۔۔۔میں پیسٹ لے کر آتی ہوں۔۔  تھوڑی دیر کے بعد پنکھے کے نیچے ہاتھ پاؤں اور منہ پر ٹوتھ پیسٹ لگائیں ہم بیٹھے تھے۔۔۔ دکھ اس بات کا ہو رہا تھا کہ ۔۔۔اس میں دو چمچ ہمدردی پاؤڈر ڈالنا بھول گئی۔۔۔۔ ہائے چچچچ۔۔۔۔۔  تھوڑی دیراسکے سر سے ہٹ کیا جاؤ اوٹ پٹانگ حرکتیں کرنا شروع ہوجاتی ہے۔۔۔ اب یہ کیا بنا رہی تھی ؟؟؟

وہ ۔۔۔وہ نا ہم نے ٹی وی پے چلی کی ساس اور  سویا کی ساس کو بنانے کا طریقہ دیکھا تو۔۔۔ تو کیا ؟؟؟ہم سانس لینے کو رکے   مگر نہیں۔۔۔ جواب فوراچاہیے تھا ۔۔۔تو یہ کہ ہم نے سوچا میری ساس رہ گئی ہیں تو میں بھی "آپ" کی ڈش جلدی جلدی بنا لیتی ہوں۔۔۔ آپ کو چکھانا تھا لیکن وہ گر گیا ۔۔۔ہائے ربا مینوں چک لے۔۔۔او میں نئی جینا ۔۔۔چک لے مینو ۔۔۔چک لے ۔۔۔ ٹانگوں پر زور زور سے تھپڑ مارتے ہوئے بین کیے جا رہی تھیں۔۔۔یہ دیکھ کر دکھ ہوا کہ اداکاری مصالحے کا ایک ڈبہ کیوں ڈالا۔۔۔بہت کم تھا۔۔۔ خیر چھوڑو ۔۔۔ساسوں ماں آرام  آرام سے ٹانگوں پر تھپڑ ماریں ناں ۔۔۔۔ اور ویسے بھی دعا ایسے نہیں مانگتے ۔۔۔دونوں ہاتھوں کو پھیلا کر  خشوع و خضوع کے ساتھ مانگتے ہیں اس لئے کہ جلدی قبول بھی ہو جائے۔۔۔اور سننے والے آمین بھی کہہ سکیں ۔۔۔۔ اس سے پہلے کہ کوئی اور مصالحہ ڈالنے کا دکھ رہ جاتا ۔۔۔ہم کچن سے ۔۔۔میری ساس۔۔۔کو صاف کرنے چل دیے۔۔۔

**************