Raya by Zunaira Noor

ریا

پانچوں دوست احمد ،نعیم،عتیق ،طارق اور اسامہ مل کر بیٹھے تھے ،عید کے تین روز تو قربانیوں وغیرہ میں گزر گئے اور اور پھر باقی پورا ہفتہ بھی رشتہ داروں سے ملاقات ،دعوتوں وغیرہ میں گزر گیا ،آج فارغ ہو کر ان پانچوں کو مل کر بیٹھنے کا موقع ملا تھا ، -                                                                                   

              تبھی احمد نے گفتگو آغاز کیا –

"بس یار پہلے تو قربانیوں میں مصروف رہے پھر دعوتیں اتنی ہوئیں کہ موقع ہی نہ ملا ملنے کا "                                                                                       

 "ہاں ساری بوٹیاں تو نے ہی  نوچی ہوں گی ،بچو !کچھ  بیوی بچوں کے لئے بھی چھوڑ دیتے "طارق نے ہنس کر احمد پر چوٹ کی -                                                                                

"بس کر ،توند دیکھی ہے اپنی ،مجھے تو لگتا ہے ساری گاۓ تو نے اکیلے ہی ٹھونس لی "احمد نے ترکی بترکی جواب دیا تو سب ہی ہنسنے لگے -                                                                    

"اچھا طارق تو بتا ذراکس کی قربانی کی تھی "                                                       

             طارق جو پہلے ہی جلا بھنا بیٹھا تھا ،انگارے چباتے ہوۓ بولا –

"تیری کی تھی "-       

"چل یار دوستوں کی معمولی باتوں کو دل پر نہیں لیتے شاباش اب یہ ناراضی کا سین ختم کر "احمد نے طارق کی پیٹھ سہلائی تو وہ بولنے پر آمادہ ہوا -                                        

     "میں نے تو دو لاکھ کا بھینسا لیا تھا ،قصائی کہہ رہا تھا کہ سر یہ بہت قیمتی جانور ہے،میں نے کہا تم جانور کی بات کرتے ہو اگر اللہ کی راہ میں اپنی جان بھی چلی جاۓ تو کوئی مضائقہ نہیں  "اس نے شیخی بگا ڑی -                                                                                    

"دو لاکھ تو کچھ  بھی نہیں میں نے تو پانچ لاکھ کی گاۓ لی تھی "احمد نے اکڑ کر کہا -     

                 "اچھا بچو !تم کو دو اور پانچ لاکھ پر ناز ہے ،میں نے تو آٹھ لاکھ کا اونٹ لیا تھا "عتیق نے دونوں کو گھوڑ کر کہا-                                                                                               

"اور بھائی میں نے تو بارہ لاکھ کا اونٹ لیا ...."                                                                                                                 

    "بس تو تو چپ ہی رہ یار ،،تیرے گھر کے باہر تو میں نے خود ایک مڑیل و مردہ سا بکرا دیکھا تھا ،یقین کر کافی دیر تذبذب کا شکار رہا کہ یہ زندہ بھی ہے کہ منڈی سے ہی مردہ اٹھا لاۓ...ہڈیاں ہی ہڈیاں تھیں "احمد نےنعیم کی بات کاٹ کر ، قہقہہ لگا کر اس پر گہرا طنز کیا -                                                                                                                     

"اور تو جو مکاری کر رہا ہے کہ میں نے پانچ لاکھ کی گاۓ لی تھی ،...میں نے تو خود تیرے بیٹے خالد کو ایک مڑیل سا دنبہ تھامے دیکھا تھا "احمد ہار مارنے والا نہیں تھا ،فورا اپنا دفاع کیا –

"نہ جی وہ بیٹا پڑوس والے حبیب صاحب کے گھر سے لایا تھا "

"لمبی لمبی نہ چھوڑ ،کل ہی حبیب صاحب سے ملا تھا کہ رہے تھے کہ ہم تو مہنگائی کی وجہ سے بکرا دنبہ نہیں لے سکے اس لئے گاۓ میں ہی حصہ ڈالا ہے "                                                          

"نہیں جھوٹ تم بول رہے ہو میں نے گاۓ بھی لی تھی"احمد طیش میں آگیا -                           

"اچھا بھائی لڑو مت اللہ بہتر جانتا ہے ،اب میری بھی سن لو "اسامہ زور سے بولا - "میں نے  بیس لاکھ کا ایک ہٹا کٹا اونٹ لیا تھا اور گوشت کی ایک بوٹی نہیں چکھی بلکہ سارا گوشت غرباء میں تقسیم کر کے عید کے دن اللہ کی رضا کے لئے وہی دال روٹی کھائی"اسامہ نے بڑے خلوص سے کہا -                                                                                      

         "اپنی اوقات دیکھی ہیں یار ،ہونہہ،میں نے تو بھینس کے علاوہ چار گاۓ اور قربان کیں اور سارا گوشت فلسطین شام برما بھجوادیا "طارق نے کہا -                                       

 "یہ تو کوئی بڑی بات نہیں ،میں نے تو آٹھ لاکھ کے اونٹ کے علاوہ دس  بکرے بھی کاٹے اور سارا گوشت  مدرسہ کے غریب طلباء کو دے دیا "عتیق نے اکڑا کر کہا -                                                                                                             

"اور میں نے ....."ابھی اسامہ بول ہی رہا تھا کہ کسی کی آواز آئی -           

            "السلام علیکم "پیچھے مڑ کر دیکھا تو  خلیل بابا  کھڑے تھے  ،چاۓ ڈھابے والے ،بہت نیک بزرگ -                                                                                                    

"جج ...جی آپ "وہ پانچوں سٹپٹا گئے ،نا جانے انہوں نے کیا کیا باتیں سن لی تھیں -        

          "ہاں بیٹو تم چاۓ پیو "انہوں نے چاۓ کی ایک پتیلی اور دو کپ تھما کر کہا اور خود پاس پڑی چارپائی پر بیٹھ گئے-                                                                   "ہاں خیریت سے ہو تم سب "

"جی جی بابا بلکل ،اور آپ....؟"                                                          اسامہ فورا سے بولا -                                                                                         

       "میں بھی بلکل ٹھیک ہوں ایک بات بتاؤں تم کو بیٹو  "                                                انہوں نے مسکرا کر کہا –

"جی ....جی بلکل بابا جی ،ضرور سنائیں "وہ پانچوں ایک ساتھ  بول اٹھے -                                                                       

                               "دیکھو معلوم ہے کہ ریا شرک اصغر ہوتا ہے ،اور ریا کا مطلب ہے کہ نیک کام لوگوں کو دکھانے کے لئے کرنا ،کسی بھی عبادت میں ریا ہو سکتا ہے ،نماز تلاوت حج قربانی صدقه  وغیرہ میں ،جبکہ عبادت تو صرف اور صرف اللہ پاک کی خوشنودی کے لئے کرنی چاہیے ،اور اللہ تعالیٰ فرماتے ہیں کہ جس کا مفہوم ہے کہ کہہ دو کہ بے شک میری نماز اور میری قربانی اور میرا جینا اور میرا مرنا اللہ ہی کے لیے ہے جو سارے جہان کا پالنے والا ہے۔،بیٹو! دیکھو ہم اتنی محنت کرتے ہیں ،اتنا مہنگا جانور لیتے ہیں ،پھر بیٹا دل پر پتھر رکھ کر  جانور کو ذبح کرتے ہیں ،پھر گوشت بھی  غرباء میں تقسیم کرتے ہیں ،اور ہم سمجھتے ہیں کہ بہت ثواب کا کام کیا ،مگر اگر ریا اور دکھاوے کے لئے کیا تو عمل ضایع ہو جاتا ہے ،پھر کتنی ندامت ہو نا اگر پتا چلے کہ وہ قربانی قبول ہی نہ تھی ،اس لئے ریا سے بچا کرو ،اگر دکھاوے کے لئے قیمتی جانور لیتے ہو تو دل میں  تھوڑا سا تکبر و عجب ضرور جگہ بناۓ گا ،اور معلوم ہے کہ جس کے دل مئی رائی برابر تکبر ہو گا وہ جنت کی خوشبو تک نہیں سونگھے گا ،اتنی محنت کرتے ہیں قربانی کر کے مگر ریا دکھاوا سب ختم کر دیتا ہے "                                                                                              خلیل بابا بولتے ہی چلے گئے،ان کی پر درد آواز نے گویا کہ پانچوں کے دل چیر دیے ،اور وہ دل ہی دل میں توبہ کرنے لگے ،انہوں نے پانچوں کے چہروں کا جائزہ لیا تو شرمندگی کے گہرے ساۓ تھے ،بابا جی نے مزید کہا،              -                                                              

       "دیکھو ابھی تم کہہ رہے تھے کہ اتنا گوشت غرباء کو دیا ،تو بیٹا چھپا کر صدقه دینا اچھا ہے کہ مخلوق کو دکھانے کے لئے ؟ٹھیک ہے پھر مخلوق سے ہی جا کر اجر لو ،بیٹو !خالص اللہ کے لئے نیک عمل کرو گے تو بہت اجر ملے گا "بابا جی تھوڑا سے جوش میں آ گئے تھے ،وہ یہ کہہ کر ایک جھٹکے سے اٹھ کر چلے گئے، -                                                                                          

               جبکہ پانچوں اندر ہی اندر سے بہت شرمندہ تھے ،انہوں نے مختصر وقت میں بڑی پر اثر نصیحت کی تھی ،پانچوں کی آنکھیں کھل گئی تھیں اور وہ دل ہی دل میں ریا ،تکبر عجب ،جھوٹ دکھاوے سے توبہ کرتے ہوۓ اپنے اپنے گھروں کی جانب چل دیے -                                                                                      

(زنیرہ نور ،)

*************